"Берыктонлэн шуг-секытъёсыз"

Нырысетӥ удмурт кылын комиксъёсын адӟытон
28-тӥ шуркынмонэ Ижкарын Германилэн нуналъёсыз улсын удмурт кылын серемтусъёсын тунсыко адӟытон усьтӥськоз. Татын возьматэмын луозы немец студентлэн Андраш Гюролэн ужъёсыз.

Алиала калыктодос

Туала мерын лулчеберет мерасэз (наследие) утён йыгмыт ужпум луэ. Ваньмызлы тодмо, туннала егитъёс пӧлын вашкала йылол-сямъёс музейысь поттэм арбериос кадь пото,  куддыръя нош соосты воксё юрӟымен но укылтэмен лыдъяло. Калыккылослы но вашкала выжыослы туала технологиос пыр вазиськон истори но калык аспӧртэмлык шоры учконэз чылкак воштэ/йырин-чукин берыктэ: калык мерас(наследие) выль валанъёсты-шӧдонъёсты асэстэ, ез (электрон) лулчеберетлэн вакытаз быдэ вуэм егитъёслы валамон кылын ачиз сярысь маде.

“Алиала этнографи” (Алиала калыктодос) нимо адӟытонлэн одӥгез меретэз/малпанэз - йӧслык йылолъёс шоры дышымтэ сэргысен учкытон, егитъёслэсь йырзэс артэ ик улӥсь лулчеберет пала берыктон. Калыккылослэсь туала луыны быгатэмзэ пусъён.

“Алиала калыктодос” адӟытон куинь люкетлы висъяське.

Концерт Мынам Яратоно Удмуртие

"Мынам Удмуртие" телерадиокомпанилы — 10 ар. Юбилейлы сӥзьыса, 3-тӥ шуркынмонэ удмурт театрын бадӟым концерт ортчоз. "Мынам Удмуртие" телерадиокомпания сое удмурт театрен но удмурт культурая "Дэмен" огазеяськонэн ӵош радъяло. Концертын шулдыр мылкыд кузьмалозы элькунысьтымы тодмо артистъёс- Геннадий Бекманов, Валентина Пудова, Андрей Ураськин, Надежда Уткина но мукетъёсыз. Озьы ик, быгатонлыкъёссэс возьматозы телерадиокомпаниын ӵош ужась эшъёсмы но. Али сценарий дасян бордын мылысь-кыдысь тыршо журналист Александр Бикузин но режиссёр Павел Поздеев.

АЛЕКСАНДР БИКУЗИН "МЫНАМ УДМУРТИЕ" ТЕЛЕКАНАЛЫСЬ КОРРЕСПОНДЕНТ:
"Куинь пол вошъям сценариез ини, малыке шуоно, трос мылкыд карисьёс пыриськыны концертэ, кырӟасьёс, эктӥсьёс. гожтӥськом кык но куинь но антракт, учкисьёслы шулдыргес, аспортэмлыкогес мед луоз шуыса."

Инфо веме: "Удмуртлык", "Удмафиша"

Григорей Славилэн суредъёсыныз возьматон усьтӥськоз

14 коньывуонэ Кузебай Герд нимо музейын 17.00 часын Вячеслав Михайловлэн (Григорей Слави) суредъёсыныз возьматон усьтӥськоз. В. Михайлов удмурт суредаськись. Ужъёсыз висъясько туала но туж аспӧртэмлыко луэменызы.

Оскар но лемлет нылкышно

3 коньывуонэ 20.00. "Дружба" кинотеатр. 

Эрик-Эммануил Шмиттлэн фильмез. Романэз гожтӥз но соя фильм пуктӥз ачиз автор. Кӧня ке толэзь ӵоже ни дас аресъем Оскар эмъяськонниын кылле. Анай-атайез но, эмъясьёсыз но солы висёнэз сярысь номыр уг верало. Ӟукыртӥсь пицца нуллӥсь Роз гинэ пияшен сюлмысь капчи вераське. Оскарез шулдыртон понна, Роз малпа таӵе шудон: кылем 12 нуналъёсысь котькудзэ 10 улон арен ӵошатоно. Озьы пияш быдэс улонзэ ортче. Нош мылкыдъёссэ, шумпотонъёссэ со кельтэ Инмарлы гожтэтъёсын, кудъёссэ Роз лобась шаръёсын инме лэзья. Огзы но уг валало на, кыӵе воштӥськонъёсы та эшъяськонзы вуттоз...   Тодмо француз актриса Мишель Лярок - та фильмын валтӥсь ролез шудэ. 18 аресказ нылаш машинаен пазьгиське но комае сюре. Сайкамез бере со малпанэ вуэ, актриса луэмез потэ шуыса.

Мар милемыз вите. Куарусён

Ижын улисьёс ас каренызы тодматись он-лайн экскурсия кылдытозы

Ижын улисьёс ас каренызы тодматись он-лайн экскурсия кылдытозы

Ижын улисьёс ас каренызы тодматись он-лайн экскурсия кылдытон бордын ужалозы.
.Мускоысь но Новосибирскысь туала суредасьёс "Россиысь туала политической искусство" темая Ижкарын улисьёслы мастер-классъёсын но семинаръёсын ужамъёсынызы тодматозы.

19-25 тулыспалэ Ижкарын "Политической искусство" проектэн герзаськем лулчеберет ужрадъёс ортчозы. Проект радъяськоз кылъя но лулчеберетъя вошъяськон(обмен) бордын ужась MitOst огазеяськонлэн юртиськемез улсын - вера ужрадэз бергатись Наталья Боголюбская.

Удмурт Кун Университетын Антон Николаев но Р. Бош нимо фондлэн лекторез Сузен Зайдель "Освоение городского пространства и медиа-проекты" нимо воркшоп (практической семинар) ортчытозы.

Ужрадэ пыриськисьёс выль сямен Ижкар шоры учкыны быгатозы, тодэ ваёнъёсынызы, ортчем учыръёсынызы герзаса карта лэсьтозы.Со сяна медиа-проект кылдытыны дышетскозы, - огъяса вера Наталья.

Политической искусствоя нуналъёслэн радлыксы:

19-24 тулыспал
Инты: Удмурт Кун Университет

"Освоение городского пространства и медиа-проекты" нимо воркшоп/семинар

19 тулыспалэ 17:00
Инты: «Известия Удмуртской Республики» газетлэн галереяез (Пастухов нимо ульча, 13).
Антон Николаев суредасьлэн лекциез («Бомбилы» группа, Муско-Новосибирск). Темаез: "Россиысь туала политической искусство".
Антон вералоз Россиысь артсцена но "Война" группаен чош кылдытэм но аслаз ужъёсыз сярысь.

25 тулыспалэ 17:00
Инты: «Известия Удмуртской Республики» газетлэн галереяез
Антон Николаевлэн возьматонэз (графика, видео-арт но воркшопэз орчытон дыръя дасям видеопрезентациез).

Кышно лирикалэн синучконаз – удмурт кырӟась Надежда Уткина.

28 толшоре Игра черко гуртын Удмурт Элькунысь сӥё-дано артисткалэн Надежда Уткиналэн ортчоз крезьгуро-кылбурето ӝытэз. «Сюлэмлы кӧкы гур» нимо программаезлэн иназ быдэсак пыӵамын кышно лирикая кылбурет. Татчы пыртэмын удмурт но ӟуч кылбурчиослэн – Марина Цветаевалэн, Анна Ахматовалэн, Римма Казаковалэн, Люза Бадретдиновалэн, Галина Романовалэн, Людмила Кутяновалэн, Алла Кузнецовалэн, Татьяна Черновалэн кылъёссыя пӧртэм аръёсы артисткаен гожтэм кырӟанъёс. Со сяна, концертын чузъяськозы на Надежда Уткиналэн кылбуръёсыз но.
Кырӟасьлы шудоз калык инструментъёсъя «Зарни крезьгур» оркестр. (Кивалтӥсез но дирижерез – Алексей Фомин).

Иж, «Авиатор» клуб, «Вордскем нуналзэ пусъе Леди Ди» шулдыръяськон жыт, 29-тӥ январь

Можга ёросын вордскем нылаш Диана Шутова 3 аресозяз чылк-чылк удмурт кылын вераськиз. Бӧрысь семьяеныз городэ улыны выжиз но анай кылзэ вунэтӥз. Та нуналлы Диана улэ Сарапулын, кырӟа асэныз кылдытэм «Bossa Nova» группаяз. «Культпросвет» промо-группа «Bossa Nova» группаез пыриз 2010-тӥ арлэн тужгес но яркыт усьтонъёсыз пӧлы. «DART» газет кичӧлтэмъя 29-тӥ январе «Авиатор» клубын ортчоз Дианалэсь Вордскем нуналзэ пусъён. Калыкез шулдыртозы удмурт рок-группаос (Amiso Wott) но ӝужась кизилиос Марина Михайлова, Алина Антонова.

Кылӥд-адӟид - иворты!

Ӝыт шулдыръяськонын шутэтскид, концертэ вуылӥд, тунсыко книга лыдӟид, выль диск кылзӥд? Тэк эн пукы - мылкыдъёстэ но малпанъёстэ вера милемлы udmdunne@udmnet.ru адресъя. «Кебит возьмасе» шедем тужгес тунсыко гожтэмъёслэн кузёоссы басьтозы «Авиатор» но Fashion клубъёсысь ӝытэ яке Udmurt party-e билет но «Мынам Удмуртие» радиолэн «Эктоника» программаезлэсь дисксэ.